就算冇入戲院睇過周星馳電影，周末放假宅在家都總會睇過周末電影院重播又重播的周星馳電影，假如你背得上當中幾句對白，甚至記得電影入面最唔起眼的茄哩啡名字，相信閣下都係成長於周星馳電影的年代，又或者你係一個不折不扣的星爺迷。
自細受姐姐影響，睇周星馳電影睇到大的Kitman（簡潔雯）細個喜歡《食神》的爆笑對白、大個就轉口味喜歡《回魂夜》的古怪離奇情節，讀書時更不時與三五知己齊背星爺電影對白，這種不用花錢的消費已夠樂足半天。兩年前更與好朋友開始畫周星馳電影主題插畫，成立「史提芬周」賣精品。
「我諗我冇咗佢會死！」會否太誇張？其實Kitman早已將星爺電影的情節融入生活，甚至不開心的時候會重看星爺電影，因為電影發放的正能量令心裏好過一點。以她最愛的《回魂夜》為例，大家把主角Leon當作儍瓜看待，他卻很堅持自己的信念，正所謂愛因斯坦話過想像力比任何知識更加緊要，Kitman更笑說唔多唔少因為《回魂夜》令她選修精神科護士學系，證明星爺電影的確有一定影響力，或者你身邊就有一個Leon。
她提到《喜劇之王》其實很慘，主角經常被人拒絕，反映現實演員的路很殘酷很難走，不過他都選擇樂觀面對。當這個世界變得很快，自己仲睇緊周星馳嗰幾套戲，畫緊電影插畫，其實都怕別人話她「out」，那有想過還繼續做嗎？「自己喜歡的事應該要堅持，不要理別人怎樣看。」她堅決地說。
在市集看到史提芬周的攤檔，就好像漆黑之中嘅螢火蟲一樣，咁鮮明，咁出眾，吸引不少喜歡周星馳的人光顧，更會自動背對白，亦因此遇上不少有趣的客人，甚至甜筒輝、谷德昭也曾光顧他們，不知道何時才能遇上周星馳呢？
史提芬周instagram : ctaifunjau
記者：畢慧婷
攝影：周芝瑩