絕世好馬「巴基之星」周日(16日)初跑二班賽，當然係全城焦點，同日其他場次，亦有好多星味十足嘅賽駒上陣，好似第10場二班1000米直路賽，「世澤之星」喺上月18號同程K.O.「歷險家」同「宇宙車神」，今場三雄再度會師，上場輸畀「世澤之星」一條頸位屈居亞軍嘅「歷險家」，今場變陣出擊，棄用贏馬拍檔黃皓楠，初配啱啱喺快活谷狂掃5Win嘅莫雷拉，擺明要復仇成功。
「歷險家」上月3日喺皓楠胯下取得跨季三連捷，上場再出人馬亦跑入亞軍，表現稱職，今次皓楠仔突然被換走，令人懷疑係雷神夾硬搶走皓楠仔私家座騎，記者問雷神，佢連忙澄清係應練馬師徐雨石邀請初次策騎「歷險家」出賽，絕對冇撬馬成份，仲稱讚皓楠仔騎「歷險家」喺4班贏到上2班發揮出色，但馬匹換人好平常，雷神話今次能騎到「歷險家」大感榮幸，仲話自己剛周三親自操過「歷險家」，隻馬狀態好對辦，抽13檔於直路賽亦非常理想，當然會力求反勝「世澤之星」。