要數立法會家陣最受歡迎嘅泛民議員，相信非公民黨楊岳橋Alvin莫屬，AY由年初參加新東補選成為議會新丁，到9月立法會成功冧莊，憑鬼馬作風、唔錯嘅口才加上C君咁嘅外形，吸引到一班女粉絲，甚至有人會去接佢放工，男神果然魅力沒法擋！但以下消息可能會令粉絲傷心鳥，皆因AY透露考慮緊結婚！
黨齡唔深嘅AY現年35歲，接棒梁家傑署任公民黨黨魁，政途無可限量嘅佢，原來諗緊踏入人生另一階段。佢喺now新聞台訪問中被問到感情事，透露有個圈外女朋友：「我覺得經歷咗漫長嘅一年，可以叫做有少少喘息時間……認真嘅感情都要諗吓結婚打算。」
嘩，咁講法其實係咪喜事近？八方都問過AY，佢澄清係就係有思考人生大事，但仲未有實際行動：「當一個人年紀唔細，需要諗吓係咪要行多一步，就係咁箒，咁有番咁上下年紀，又唔係冇對象，都要諗吓。」
遊日拜神防脫髮
如果AY要拉埋天窗，同佢譜出「娥頸橋之戀」嘅陳玉娥，唔知會唔會送上最摯誠祝福？就算AY脫離單身行列，八方相信一向鬼馬嘅佢都唔會改變作風，AY都笑笑口話希望自己唔會破壞公民黨形象。
至於接替梁家傑做黨魁，令佢最擔心嘅竟然係：「我會唔會4年後頭髮少過梁家傑？」佢笑稱早前去日本時到訪守護頭髮嘅神社，祈求脫髮速度可以減慢喎！
李八方
mailto:[email protected]