下星期三除咗3位被指宣誓無效嘅新議員再宣誓，民建聯老將黃定光原來都甩咗轆，同樣要再嚟過。至於以龜速近12分鐘讀完誓詞過關嘅劉小麗，唔少人話唔明佢宣誓方式係咪行為藝術嘅一種？藝術呢家嘢，八方識條鐵咩，何況唔係藝術家嘅梁美芬？梁美芬噚日喺電台節目點名批評劉小麗宣誓態度兒戲、玩嘢！
查實劉小麗宣誓後有向傳媒解釋過點解咁慢，佢話呀，宣誓時每讀一個字，內心都會先數6秒，之後再讀下一個字，慢速嘅含意係：「如果每個字都相隔6秒，你點可以覺得佢係一句句子嚟呢？可能係90幾篇文章嚟！」佢話係想表達宣誓內容嘅「虛妄」，「唔係聽緊一啲有內容嘅嘢」。聽完都唔明？八方都愛莫能助。