香港啲樓咁貴，邊度有咁多人負擔得起？睇番今屆立法會26名新丁議員，就有逾半、多達17人申報無持有土地或物業，嗱，年輕一族嘅青年新政梁頌恆、游蕙禎、香港眾志羅冠聰同熱血公民鄭松泰等冇樓揸手一啲都唔奇，八方反而奇怪，唔少來自專業界嘅新丁，例如法律界嘅新民黨容海恩、民建聯張國鈞同周浩鼎都係無殼蝸牛，唔通覺得仲未係入市時機？
至於新丁中邊個係物業王？八方相信鄉議局主席劉業強都有機，但佢嘅申報只係寫有樓有地，冇寫數目喎；而公民黨飛機師譚文豪則喺本地同海外有5個物業，一枝獨秀。
喺理大香港專上學院任講師嘅劉小麗亦有兩個物業揸手，緊隨譚文豪其後，多過只有一個港島區物業嘅建築、測量、都市規劃及園境界姚松炎。