體壇短打：
路斯涉姦案女警中槍亡

今夏轉投紐約人嘅戴歷路斯（Derrick Rose）因為涉嫌強姦前女友一案，已經搞到滿城風雨，但估唔到呢單案仲未查出真相，有份負責調查嘅女警員靴南迪絲（Nadine Hernandez）竟然喺周二中槍身亡！

據洛杉磯傳媒透露，有人發現靴南迪絲周二喺加洲嘅一間屋入面中槍，雖然已經即刻叫白車送佢入院，但最終心口中槍嘅靴南迪絲，都係傷重不治，享年44歲；當地警方就話喺現場發現到一支槍，仲會將靴南迪絲身亡一事視為自殺。
不過，洛杉磯警方知道靴南迪絲過身後，就發表聲明指佢有份參與調查戴歷路斯涉嫌強姦前女友一案。洛杉磯警方話：「截至目前為止，我哋唔肯定靴南迪絲嘅死，同佢有份參與調查嘅案件有冇關係。」路斯涉嫌喺2013年同咸頓（Randall Hampton）、賴恩阿倫（Ryan Allen）兩位朋友強姦前女友，呢單案件𠵱家就審緊，而有份調查嘅靴南迪絲喺呢個咁敏感嘅時間中槍身亡，真係難免令人覺得呢件事有可疑。

另外，講番NBA周三嘅季前賽，塘鵝喺北京除咗以104:116輸畀火箭外，主力安東尼戴維斯（Anthony Davis）仲因為踩中尼利（Nene Hilario）腳背，搞到扭傷右腳踝，預計至少要唞10至15日。而贏波嘅火箭都唔開心得去邊，因為控衞B布朗（Bobby Brown）喺長城簽名證明到此一遊，引起強國網民公憤。