喺比利時國家隊做後備，返到利物浦又係坐冷板，門將米洛列特事業停滯，所以決定搵吓新出路。我求大俠唔係話佢轉會，而係兼職創業，學我哋香港藝人陳豪開咖啡店，齊齊品味咖啡。
家鄉開舖用22號命名
米仔喺家鄉比利時嘅聖圖爾登開舖，將間咖啡店命名為「22咖啡」，因為佢喺紅軍嘅球衣號碼都係22號。呢位28歲比利時門將話佢只係負責打本，呢檔生意會交畀屋企人打理，由佢兄弟負責話事，而米仔老婆都會幫手。前排趁國際賽期返比利時報到，米仔都有喺舖頭接受訪問，做吓宣傳；相比咖啡店賺錢，佢話當下首要目標都係爭正選，「我唔希望繼續咁落去，我好積極㗎，好想上陣對曼聯。我會盡量做好百分百準備，無論主帥派唔派我上陣，都唔會改變我備戰嘅態度。」
由上輪對史雲斯所見，紅軍主帥高路普好睇重德國靚仔門將卡利奧斯，睇怕米仔下周一都要做最近嘅觀眾。另外，利物浦會喺「雙紅會」換一換波衫心口贊助，着住印有「Seeing is Believing」嘅主場波衫出戰，宣揚預防失明嘅訊息。
講起「雙紅會」，利物浦守將安利簡恩應該可以克服足踝傷患復出，但中場韋拿杜姆同拉爾拉拿就上陣成疑；曼聯方面都有左閘勞基梳爾同中場米希達利恩受傷患困擾，未知踢唔踢得，至於「玻璃人」菲爾鍾斯就繼續唞。另外，英國《每日鏡報》話，曼聯諗住季尾踢走就31歲嘅朗尼，但朗尼家陣咁高人工，如果曼聯要送走佢，可能要賠成2,600萬鎊（約2.5億港元）；曼聯又發覺自己嘅球探系統唔太掂，由今年一月起改革，到家陣已經委託獵頭公司幫佢哋請咗50個新球探，睇吓呢班球探嚟緊會唔會幫紅魔發掘到多啲新星啦。