昔日嘅議會反拉布重炮手工聯會王國興，轉戰超級區議會攞到23萬票但落敗，緣盡立法會，唔等於唔再理立法會。佢噚日同喺新界東落敗嘅鄧家彪以「23萬監察」成員身份見記者，大鬧立法會議員宣誓「加料」，話會去信立法會主席梁君彥要求嚴格執行議事規則喎。
王國興告別議會，唔知有幾多人會懷念呢位日以繼夜、夜以繼日反拉布嘅主將？八方更關注佢歷年嘅自製道具有乜去向？MC興果然又有創舉，佢話已經向康文署申請，將立法會議會文化列做非物質文化遺產，希望可以將百幾件道具放喺歷史博物館！
MC興引述康文署回覆咗兩次，指對方正在考慮中，舉例用嚟爭取傷殘津貼嘅「天殘腳」，扔去堆填區真係好可惜，強調都係歷史一部份，應好好保存。