由教宗方濟各發起、為早前意大利地震災民籌款嘅慈善賽周三喺羅馬上演，藍白兩隊球星如雲，有馬勒當拿、托迪、朗拿甸奴、華朗同基斯普等。場波以「和平之戰（Match for Peace）」為名，但過程就有少少唔和平，馬勒當拿同華朗意見不合初則口角，好彩冇繼而動武。
場波白隊以4:3勝出，臨完上半場雙方踢成2:2嗰陣，大家都收晒油慢慢行住踢，點知老馬攞波嗰陣被華朗撞跌，之後冇耐球證就吹雞完半場，老馬仲拉住華朗吟吟噚噚，仲驚佢哋走返入更衣室會唔會將衝突升級，好彩前拉素中場莫利賽後話：「更衣室氣氛冇問題，佢哋喺嗰度已經有講有笑。」至於喺地頭奧林匹高球場比賽、同老馬做藍隊隊友嘅王子托迪，呢場波由前者助攻下入咗一球，佢賽後講笑咁話：「終於可以同馬勒當拿並肩作戰，𠵱家我可以開開心心咁退休喇。」
