嶺南大學刊物《嶺南大學電子通訊》，9月份文章《四位嶺南人當選立法會議員》，將何君堯、羅冠聰、游蕙禎同李國麟稱為傑出嶺南人，引起極大反響，反對矛頭當然直指言行惹火嘅嶺大校董何君堯。
其實該校學生會早前已經出聲明，要求校方收回言論並向全體嶺南人道歉，皆因何君堯只係由特首梁振英委任，冇民意認受性，加上曾喺校內論壇掟咪離場拒同學生溝通，又批評嶺大學生思覺失調等，覺得校方叫佢做嶺南人有辱全體師生校友。
嶺大傳訊及公共事務處噚日就此向校友關注組發信，話留意到校友及同學對篇文嘅評論，「為使是次討論告一段落，文章已從嶺大網頁上刪除」，平息風波。