歷年主辦7.1大遊行嘅民間人權陣線，噚晚舉行周年大會改選召集人，由現年29歲嘅民主黨南區區議員區諾軒（圖）喺冇人挑戰下當選。區諾軒強調民陣係佢政治參與嘅起點：2008年代表中大學生會參與會議，後來代表民主黨擔任民間同政黨傳訊嘅角色，其後則以議辦名義加入，2014年仲參與秘書處財政工作㖭！至於秘書處同副召集人將會喺稍後籌組，預料下次大會通過。
想搞更靈活抗爭
區諾軒話民陣今屆改選，正值特首選舉，加上明年回歸20年，團結公民社會、積極組織抗爭係民陣面對嘅挑戰。佢任內除咗會邀請更多團體加入，組織傘後力量，亦會贒實同追究警方濫權瀆職等，同時喺人權方面推動反歧視立法。
佢話認同可以同各團體籌組新組織形式，搞更靈活嘅抗爭，彰顯非暴力抗爭嘅可行性。佢當選後強調：「碎片化的時代，無法為推動社會改革帶來出路，我們需要的，是更多的諒解與團結。」