唔少朋友問左丁山每日點解睇咁多份報紙，答案好簡單，因為本地報紙愈來愈分化，過往新聞系畢業生講俾左丁山聽啲新聞報導原則，全部過氣冇用。淨係睇任何一張報紙，好容易以偏概全，不知事物全貌，亦會遺漏不少有趣新聞。
不同媒體各有不同政治立場，香港有擁梁反梁之爭，美國亦有擁特朗普擁希拉莉之別。十月十日早上（美國時間十月九日晚）睇美國總統候選人辯論，就知得清楚，美國好似冇「選舉公平條例」，媒體講總統候選人，永遠只提兩個──特朗普與希拉莉，第三位Gary Johnson完全無人理會，辯論會一定冇佢份，十足隱形，如此情況下，呢位詹森先生仲係有四、五個百分點支持率，真係奇蹟之中嘅奇蹟。
嗱，辯論一完，BBC嘅政治評論員就話兩人旗鼓相當，辯論戰如果唔係打和就可以話係希拉莉以些微點數取勝，霍士新聞素來係特朗普老友，做聚焦小組討論，得出結論係特朗普大勝，有機會贏大選；CNN素來中間偏左，做民意調查話希拉莉大勝，57%對34%，拋離特朗普幾條街。
媒體意見有咁大不同，究竟信邊個呀，睇你政治立場囉，今日媒體，已難言中立。所謂中立，好多時就係各打五十大板先報導左，再講右，然後列舉一張事情發展嘅時間序列，等讀者自行判斷。大編輯話呢套報導方式已經out晒，今天記者編輯持有一套態度（attitude），講新聞帶有advocacy（主張）味道先至啱，即係話新聞媒體要有主動性，站在前線領導潮流，譬如，如果編輯記者都相信平權，每次報導類似新聞，都站在擁護平權角度，絕不妥協。讀者想知道反平權嘅言論呀，唔該睇另一張報紙。既然如此，絕大部份媒體都愈來愈有傾斜性，唔講公平公道咯。不過從另一角度睇，advocacy journalism幾似共產國家控制媒體，專門報喜不報憂，或報憂不報喜，只係反映自己喜歡睇到聽到嘅意見，到最後就係自欺欺人。好似霍士新聞電視咁，日日講特朗普可以贏，特朗普樣樣啱，到頭來如果特朗普大敗，霍士便會成為新聞界大笑柄，到時大老闆梅鐸不知有何感想。媒體大老闆刻意容許旗下新聞台日日高叫特朗普會贏，直情係以一敵百，分分鐘另有圖謀。