按揭證券公司噚日搵來兩父女sell安老按揭計劃，如果大家N年前有睇開歡樂今宵，就一定認得係有「屯門王子」之稱嘅鄧英敏，佢女兒鄧上文2005年參選香港小姐，仲拎過「最上鏡小姐」㖭呀。
鄧英敏之所以叫「屯門王子」，因佢由細到大喺屯門長大，之後成為歡樂今宵台柱。白髮比佢多嘅按證總裁李令翔，竟然堅稱話細細個已經睇鄧英敏大。不過後來俾鄧英敏踢爆，話大家都年近60喇。
今次按證搵鄧英敏sell安老按揭計劃唔係冇原因，原來鄧上文淡出娛樂圈後，已經快手生咗兩個，家陣亦陀住一個，好快成為三子之母。
大家都話養大一個B要400萬，鄧英敏都話阿女好夠膽，為咗減輕阿女畀家用嘅壓力，又想間中同老婆坐郵輪旅行，佢都好有興趣申請安老按揭咁話。