中環在線:德勤寫字樓夠Open - 李華華

中環在線:
德勤寫字樓夠Open - 李華華

今時今日,唔少大企業嘅辦公室實行電子化,兼且仿效Google、facebook等外國企業,比較多開放空間,Big 4會計師行之一嘅德勤,年幾前開始翻新太古廣場六層寫字樓,上月正式完工,採完全開放模式,普通員工全部冇固定枱。
德勤引入「Book枱」程式,原先大部份員工有私家枱,𠵱家員工可按需要預訂寫字枱,最長可以book兩星期,每名員工會獲分發locker擺私人物品。
德勤華南區主管合夥人黎嘉恩指,好多同事經常出外工作,留喺公司嘅時間唔多,呢個book枱模式較靈活。不過,後勤部門好似秘書、電腦部,就保留「一人一枱」。
其實唔只德勤,舊年安永亦引入類似系統,辦公室換咗開放式長形辦公桌,仲話呢個大趨勢㖭。
黎嘉恩拒絕透露今次翻新費用,只形容為「天文數字」,好似一去到詢問處就見到樓高三層、面積6米乘13米嘅電子顯示屏,就已經花費過千萬,呢幅仲可能係全港室內最大嘅顯示屏㖭呀,認真落本。

德勤全個寫字樓採取完全開放模式。 江靖然攝

員工只要拍卡就可book枱。

會議室

花費過千萬的電子顯示屏。