港交所（388）行政總裁李小加一向同深交所關係唔錯，不時組隊踢波，噚日佢上咗深圳，不過就唔係搵深交所嘅朋友仔，而係等國務院總理李克強到訪。
李克強去完澳門，過咗去深圳出席「2016年全國大眾創業萬眾創新活動周暨第二屆深圳國際創客周」，李小加因此有機會向對方介紹港交所「前海聯合交易中心」發展計劃，小加係內地人，講解起上嚟似乎特別同聲同氣，功架十足。
前海聯合交易中心係一個創新型交易平台，想將倫敦金屬交易所（LME）嘅模式移植到前海，幫助中國大宗商品市場服務實體經濟，定出大宗商品中國基準價格。
港交所之前已經同深圳市前海管理局簽訂合作備忘錄，計劃明年中前啟動。港交所噚日亦委任郭曉利擔任前海聯合交易中心行政總裁，郭氏曾經做過鄭州商品交易所總經理、大連商品交易所常務副總經理。