練馬師方嘉柏完全重拾谷草王本色，呢晚已經係佢連續第二次谷草夜賽食出頭糊，上次係同雷神合作贏大熱門「糖黐豆」，今次快活谷頭場五班1650米，方嘉柏、雷神又憑「想贏就贏」大熱掄元，後駒第13次出賽卒之開齋，單Win及組合獨贏A1分別派23.5及18元。
「想贏就贏」馬主是胡定旭，她與應屆十大傑出青年得獎者之一的黃仰芳為好友，年近四十的黃仰芳27歲便上車，2年幾內已「供斷層樓」，又曾與胡定旭八號風球下一齊慶生，不過這晚只見胡定旭拉頭馬，未見黃仰芳。
回說方嘉柏，眨吓眼他已經連勝三次谷草夜賽及連續四次賽事贏馬，榜首優勢又加一場，而家以12Win領導群雄。「想贏就贏」今場用番上季曾策上名的雷神，留前鬥後齋跑半條直路，鬥贏董事馬「野外桃源」以一頭位之先勝出，「野外桃源」上次不敵「萬醒仔」，呢勻柏寶留放一絕都係贏唔到，馬主認真唔好彩。
這場由「想贏就贏」同「野外桃源」開出9.3倍大熱連贏，三、四名分別為「辣得寶」及「精彩時機」，四重彩派二萬一千幾。「想贏就贏」於周日(16日)五班1600米有報名列為第一後備評133頂磅，今仗勝出依例加七磅，因超磅關係，故明早排位前將自動退出。
小方指出「想贏就贏」處五班有利，以往同程都近過，路合態勇班次有利，贏得合理。