中國男足喺世盃外12強賽四戰不勝，周二作客烏茲別克輸0:2，加上卡塔爾喺同日開齋，所以得一分嘅國足家陣衰到喺A組包尾，出線機會渺茫。就算國足搵到「銀狐」納比（大陸譯里皮）出山，睇怕都只係為名譽而戰，實在難以回天。內地網民睇得好清楚，單靠足球嘅技術同戰術都難以幫國足打入世盃，只能FF諗辦法。我求大俠集結網民智慧，一於今日上京，為習大大獻上三大奇計！
下策：搜敵軍黑材料
先講下策，喺對敍利亞賽後，已經有網民預見國足踢完10場都得一分，但諗到個方法出線到世盃，就係伊朗同卡塔爾等全部咁啱受貪腐醜聞影響，被國際足協取消晒資格。如果習大大想喺在位期間見證國足踢世盃，不妨參考吓，將近年搜刮打老虎黑材料嘅力量，用喺對付其他亞洲國家足總之上，相信會有唔少收穫。到時國際足協取消晒伊朗、卡塔爾、烏茲別克同敍利亞嘅資格，咁國足咪躺着都可以出線囉。
中策：收歸大國版圖
之後到中策，呢排內地最興話南海自古係中國嘅一部份，我哋可以照辦煮碗，將元朝地圖拎出嚟，話南韓、烏茲別克、伊朗同敍利亞自古都係中國嘅一部份。原來同組隊隊都係中國嘅一部份，咁國足咪可以出線。此計最妙之處在於，令孫興民、奇誠庸同迪積柏洛夫等全部變做中國人，大大加強國足實力，有助國足喺世盃決賽周行得更遠。不過下策同中策可能牽連甚廣，影響到國際關係，所以仲有上策！
上策：加入南極足協
上策喺網絡流傳已久，但一直得唔到正視，但家陣國足反正都喺絕境，習大大不妨一試。第一步，建議國際足協分配一個名額畀南極洲；第二步，中國足協申請加入南極洲足協；第三步，國足同南極企鵝踢主客兩回合爭出線；第四步，力爭作客一戰逼和企鵝；第五步，將主場安排喺海南島嘅三亞，熱死企鵝出線。有人會話中國離南極咁遠，點可以申請入去呀！我求大俠向中央舉薦一人，香港有一奇士689，擅長「搬龍門」，若果中央唔撐佢連任，而搵佢參選國際足協主席，此計可成。有689喺國際足協，相信國足唔難加入南極洲。唯一隱憂係，怕就怕納比喺呢個時候話：「咳！咳！對國足嚟講，第四步好難做到喎。」
