贏夠未呀！跑完前三場，已經好多網民向雷神提出呢個問題。結果雷神用行動話俾大家知，佢同方嘉柏都未夠喉，兩人於第四場四班1200米合作又贏，主角「全勝姿態」12檔起步留前鬥後，放棄前段，半條直路後上掃晒，彈甩個半馬位建功，單Win及組合獨贏A2分別派49及26元。
這晚頭四場賽事全由雷神贏晒，頭馬順序為「想贏就贏」、「嶺喜峯」、「索咖啡」及「全勝姿態」，除了「嶺喜峯」屬徐雨石，其餘三駒均是方嘉柏馬房。而上半場結束後，雷神四喜臨門，但騎師王早於第三場賽後已封盤唔受注。
回說四歲馬「全勝姿態」，上季由雷神騎過一次跑第五，上仗季內初出用潘頓則於谷草五班1200米輸俾「明多多」做阿二，呢次跑高一班換雷神孭輕十幾磅，服役第11次出賽終於開齋，女馬主李麗雯特意紅色連身裙加紅鞋到場，果然旺起「全勝姿態」，李麗雯打破自己兩年幾頭馬荒，佢對上一次贏馬係前年5月尾谷草勝出「方程式」（已退役）。
呢場二至四名全屬冷門，順序為「確威龍」、「新添」及「英姿茂盛」，四重彩派31萬幾。