踢完國際賽，聯賽又返嚟，呢輪重頭戲肯定係下個禮拜一嘅英超「雙紅會」，由利物浦主場對曼聯。如果講利物浦今夏最好使好用嘅新兵，可能第一時間會諗起前線嘅沙迪奧文尼，但小弟覺得中堅祖爾麥迪比都唔錯，可以同曼聯嘅伊巴謙莫域爭做今季英超最佳免費兵。
麥迪比今年25歲，喺德甲嘅史浩克04出道，嚟紅軍之前已經有近200場德甲上陣經驗。麥迪比身材高大，有1米95高，頭槌當然唔錯；不過，唔好以為佢係似紅軍名宿希比亞或者車路士隊長泰利嗰種英式中堅，呢位喀麥隆守將腳下工夫唔錯，幾有柔韌性，有一定向前推進能力，但有時專注力唔夠。唔計級數，齋睇特點的話，佢似里奧費迪南多啲。季初利物浦成日唔夠中堅用，馬馬度沙高長傷，卡拉雲同洛夫雲亦有啲「玻璃」，周不時養傷，麥迪比算係最硬淨。
麥迪比係領隊高路普睇中好耐嘅目標。以前高路普教多蒙特嗰陣，每次魯爾區打吡大戰，高帥都會留意麥迪比嘅表現，但要多蒙特直接買到史浩克嘅青訓產品，真係難咗啲。高路普自己都講過，佢一離開多蒙特後，就已經諗定如果新東家要買中堅，佢就會羅致麥迪比。機會果然嚟到，高路普喺今年一月出手，勸掂佢唔好同史浩克續約而過嚟利記；今季嚟到之後，麥迪比亦融入得好快，家陣已經鎖定正選位，係睇吓兩嚿雲（洛夫雲、卡拉雲）邊個冇傷，就做佢拍檔。
利物浦簽呢啲免費兵都幾有眼光，喺同一條防線入面，家陣踢左閘嘅占士米拿都係自由身加盟，由前任主帥羅渣士用誠意請佢過嚟。平嘢唔一定冇好嘢，件貨好唔好同價錢無關，而係同買嘅人眼光有關。
文：咖喱