最近香港又出現一單花生味好濃嘅新聞──香港傑青日前公佈名單，小弟都唔知幾時開始，傑青唔再係十大，不過冇所謂，大台所謂十大XX金曲都冇埋啦，只要夠認受性，一個都冇問題。其中一個得獎者胡兆康就真係實至名歸喇，小弟年輕仲係體記嗰陣，都不時訪問康仔，佢待人接物真係非常友善，訪問、影相都冇話托手踭；佢之後戰勝癌症，仲拎到世界盃冠軍，真係好值得香港人學習㗎。
至於其他得獎者，坦白講認識唔多，其中一個黃姓女得獎者，小弟真係唔知佢做咗咩公職，對社會有咩貢獻；佢本身任職私人財務機構，最自豪竟然係2004年已經上車買樓，𠵱家有樓有舖收租喎。坦白講，站喺唔少香港人角度，有高薪厚職、有樓收租，又真係傑出喎！
小弟真係唔知啲香港人諗乜，就好似有位新當選女議員講「扑嘢」，喂，佢只不過將香港年輕人𠵱家嘅困境如實反映箒，唔通改用「敦倫」，大家就會覺得開心啲咩。
小弟特登翻查吓傑青嘅候選資格，年齡要介乎21至40歲之間，如果伊巴謙莫域係香港人，35歲嘅佢當然有機會入選。不過，香港人踢波又有幾傑出？小弟翻睇過歷屆傑青得獎者，只得「郭指導」郭家明喺1977年拎過（有錯請指正），之後香港都冇球員得獎。
根據黃姓女得獎者嘅口脗，伊巴都唔係好傑出，事關佢都要租樓；伊巴近日睇中咗一間位於柴郡嘅豪宅，業主開價220萬鎊，以伊巴拎緊曼聯22萬鎊周薪，要買容乜易？不過，伊巴選擇用月租六千幾鎊租咗個單位，喺香港呢啲叫租奴，叫做幫業主打工，冇出息。下周一呢個咁冇出息嘅前鋒在陣，曼聯作客利物浦又點拎到分？
文：牽牛