三哥苗僑偉雖然已經五十有八，仲有兩年就登「六」，但對佢嚟講年齡唔係問題，次次出嚟都係一貫chok爆型佬look。平時做開「型警」嘅三哥原來唔係電視上先見得到，前日讀者李小姐透過本報「爆相爆片」，分享喺南生圍「捕獲」三哥指揮交通嘅情況。
慢慢後退
大前日雙十節，李小姐一家大細揸車去南生圍郊遊，因為嗰度係單程路，加上兩邊行人路又有唔少路人，令現場交通頗為混亂。李小姐話冇耐見到一個着住白色T恤兼戴住黑框眼鏡嘅男人，逐架車叫佢哋慢慢後退，當時佢都冇為意，直到佢老公話呢個係三哥苗僑偉嘅時候，佢真係好愕然。片中就爆咗一句：「真係㗎！？好有型呀三哥！」李小姐話開頭都唔信，行近啲見到真係，即時讚唔停口：「佢身形真係好fit，把聲仲好溫柔。嗰陣因為有車出唔到嚟，佢就每架車幫手叫我哋退後，可能冇諗過會喺呢個情況下見到佢，所以大家都慢慢退後。」查實唔止司機愕然，連啲路人都忍唔住向後望！
至於搞咗幾耐啲車先退後晒？李小姐話：「我諗有10分鐘度，我架車後嚟泊咗埋一邊，就冇再睇到佢行咗幾遠。」
