新一屆立法會噚日開鑼，市民焦點梗係喺一眾新丁議員身上，尤其年輕貌美又語出驚人嘅青年新政游蕙禎，其他連任嘅舊將已經係明日黃花咯，好似上屆新丁兼係焦點嘅民建聯蔣麗芸吖，今屆已經冇人理，係咪好現實呢？唔知係咪唔慣被冷落，元秋噚日無論衣着以至宣誓都突圍而出，see-through旗袍兼以國語表示效忠，瞬即搶番少少關注度。薑，果然越老越辣！
先講衣着吖，大部份女將噚日着套裝之際，元秋以一套黑旗袍亮相，不得不提嘅係，佢嘅黑色白格旗袍係see-through，睇真啲個衩仲開到上屁股，係咪好誘人呢？元秋喺外面加咗件黑外套，雖然有個小小肚腩仔，都比平時流露多咗高貴感覺。
Tanya都讚靚
佢喺走廊遇到同樣着咗黑色連身闊膊裙、走型格路線嘅公民黨陳淑莊，兩人惺惺相識互畀like……講嘅係衣着嗰方面箒。兩位黑衣女言笑甚歡，分享穿衣之道，Tanya讚元秋呢身打扮好靚吖，冷不妨元秋笑稱：「我哋都有啲taste嘅！」有傳媒聽到後笑到咔咔聲，佢扮嬲問人哋：「笑咁大聲做乜呀？」
議會外吸完睛，元秋議會內再進一步搶鏡，唔使衝主席台，「以文制武」煲冬瓜突圍，成為今屆唯一一個國語宣誓嘅議員，令阿爺聽得更冧之餘又有曝光機會，元秋呢一招，似乎一舉兩得。
李八方
mailto:[email protected]