香港有李家，台灣都有富邦蔡家，係台灣知名金融家族之一。富邦香港銀行母公司富邦金控喺台灣規模數一數二，銀行保險業務與第二大電信商台灣大哥大，就係集團兩大業務板塊。自從前年阿爸蔡萬才過身後，阿哥蔡明忠同細佬蔡明興就一人負責一瓣，分管金融與電訊業務。
大家睇得糖心風暴多，一講家族生意，通常諗人幾時分家產，富邦兩兄弟冇分家，噚日仲宣佈交換工作，阿哥蔡明忠以後負責睇電訊，細佬就轉睇銀行保險，似係好有默契。
查實呢單消息傳咗一年，話阿哥蔡明忠喺保險業務發展方面，一向有聽細佬意見，而且佢對電訊業務較有興趣，咁就不如交換工作喇。阿哥之前仲成日同台灣傳媒講，佢同細佬嘅分工經常會有調整，一定唔會分家咁話。