下任特區行政長官如果要北京大力支持，為國立功嘅話，左丁山有一條好計送俾佢，就係搞好香港足球，製造三四個前中後場球星，叫佢哋代表中國，唔好加入香港隊，一於為國效勞。老實講，呢條係舊到無可再舊之橋段啫，1950至1960年代，香港之寶姚卓然，一對快翼黃志強、莫振華，還有張子岱，中場靈魂黃文偉，重炮手林尚義等等，皆選擇代表中華民國隊，唔肯入選香港隊嘅，不過今日香港已無呢類超級球員，特區政府正宜急起直追，在體育學院及傑志足球訓練中心培養青年球員，為國儲材。
點解咁樣講呢？唉，睇完中華人民共和國足球代表隊（國足）在世界盃外圍賽對敍利亞，輸零比一，就知道國足幾水皮啦，13億人嘅代表喎，GDP世界第二大喎，大富豪中富豪多到無倫，買起國米、AC米蘭、阿士東維拉、侯城，入股馬體會喎，咁嘅強國，銀紙大把，正在所謂和平盛世，都搵唔到一隊球員嚟擊敗內戰連年，哀鴻遍野，日日不知生死嘅敍利亞？講起就羞家，中國北方球員技術過份粗枝大葉，踢波如盲頭烏蠅，在國際舞台，真係難登大雅之堂，昔日球星如容志行、古廣明都係廣東人，山東關東大漢顯然不濟。
左丁山有啲懷疑，內地賭風猖獗，賭波流行，儍到、癲到連香港足球預備組都賭，有人因而用九萬元賄賂球員，令五名飛馬隊嫌疑球員被廉署調查，背後原因明白不過，就係投注注碼不少，故此開賭之人先至用金錢製造戰果，以此推論，中超冇人為戰果才是人間奇蹟，久而久之，就影響球員之作戰心理，上到世界波級數，就冇咁易谷起作戰狀態。
如果習近平有睇中國輸俾敍利亞嗰場波，相信佢會面黑兼勞氣，中國足協一眾領導點交代呀，國足有九成機會失去參加俄羅斯世界盃資格啦。此其時也，有意參加2017特首競選嘅高人，不妨在政綱內加多一條：「振興足球為國儲材」，內容就係如何實現中國足球夢，從香港進貢最少五個香港足球猛將進入國足隊，甚至乎大膽啲復用1958年亞運模式，中華民國足球隊全是香港人，林尚義被趕出場，以10個打11個仍然戰勝南韓得金牌。至於今日之國足隊肯唔肯咁樣，咪由習近平發落囉，唔好以為左丁山寫怪論呀，國足咁水皮，連香港都贏唔到，訂下目標，由香港球員代表國足，點解唔得。