國足周二作客0:2不敵烏茲別克，鬧劇喺完場後繼續上演，教練高洪波賽後表示承擔責任宣佈請辭，仲以身體不適為理由唔出席記者會，不過國足團長于洪臣就嬲嬲，話提出請辭都要經過一定程序，唔係話辭就辭，好似情侶嗌分手講今次係我飛你，唔係你飛我
重用契仔亂改陣
點都好，國足四戰得一分呢個鑊，都係高洪波孭硬，外號「高紅包」嘅佢，教練生涯聲譽都真係毀譽參半，早年為求執教廈門藍獅，曾經向領導付出數以萬計人民幣同手提電腦等禮物，結果換來高紅包之名。今次點兵都好多爭議，好似起用轉會華夏幸福時因合約問題而開季冇比賽踢嘅任航，而老將杜威失咗球隊正選，都仲喺國家隊踢正選中堅，難免被批評重用契仔之說。雖然上圈最後階段兩連勝，幫國足奇蹟出線，但到12強賽改踢國足較陌生嘅5-3-2陣式，亦都令球隊陷於劣勢。
不過其實唔少球員都幫高洪波講好說話，好似翼衞趙明劍都話唔應該怪晒高教練，而且高洪波私底下對助教都有情有義，國內傳媒爆料，話中國足協唔肯開水喉，高洪波私底下扣40萬年薪，靜靜雞分畀兩位助教傅博同區楚良，等佢地有合理水平人工；仲有中國足協唔肯放水開情報小組，高洪波就用人情卡，搵張寧等前國腳幫手。
點都好，國足12強賽神仙都難救，中國足協都要搵接任人為未來打算，𠵱家又傳緊搵意大利名帥納比，以佢帶過意大利拎世界盃，教廣州恒大又拎亞冠盃，夠晒資格啦。