中國神仙難救，呢邊南美區嘅阿根廷就仲有得救，但就要求神拜佛美斯快啲傷癒復出囉。阿根廷喺周二世盃外又失分，主場迎戰巴拉圭爆冷輸0:1，近三場外圍賽冇美斯上陣只係攞到兩分，你話冇美斯倚賴症都冇人信。
巴拉圭喺開賽18分鐘就先開紀錄，阿根廷喺下半場開波冇耐本來有扳平良機，但阿古路主射極刑宴客。輸波之後阿根廷已經跌出前四名，再次出現出局危機。𠵱家踢咗10場波，阿根廷有美斯在陣就三戰全勝，冇美斯嘅話就七場贏一次，班國民仲成日鬧美斯冇愛國心，𠵱家就知佢喺國家隊嘅重要性有幾大。
巴西熄燈照贏
阿根廷繼續唔掂，死對頭巴西就狀態大勇，新帥堤迪喺上月正式上任之後，四場世盃外全部贏晒，周二作客委內瑞拉，就算有尼馬停賽缺陣，由加比爾捷西斯同韋利安各建一功下贏2:0，四連勝升上榜首。