有大量粉絲嘅康宏金融行政總裁莊偉忠，今年8月返新工冇耐就心臟病發，休息一輪，佢9月底病癒復工，噚日仲現身主持一個內部員工大會，見佢精神唔錯，只係比之前清減些少。
康宏噚日喺九展舉行員工大會，順道宣佈同富邦人壽簽訂策略性夥伴協議，簡言之，康宏之後可以推銷富邦兩隻產品，莊偉忠西裝骨骨、靚靚仔仔咁主持呢個大會。
佢幽默感不減，向現場過千名同事話，早兩個月的確係經歷生死，目前逐步康復當中。佢希望大家今年第4季嘅生意做好啲，當係送畀佢嘅康復禮物咁話。
不過唔知大家有冇留意，莊偉忠以前為一田百貨做推廣宣傳，面對傳媒揮灑自如，但9月復工之後，即使康宏有宣傳活動都唔見佢影蹤，噚日亦都只係康宏嘅內部員工活動，公司喺活動後發相，冇安排傳媒採訪，莊偉忠似乎暫時唔想應付傳媒喎。
原來莊偉忠雖然康復，但擔心如果要面對傳媒多方面提問，未必能夠應付。而事實上，佢家陣說話嘅速度都比以前慢咗同陰柔咗，冇以前咁激昂。
其實大家都明白嘅，佢心臟病康復冇耐，萬一動氣或太操心，對住傳媒一時激動起嚟，影響身體就唔多好。健康真係最重要，華華都希望莊偉忠慢慢掌握番工作嘅節奏，做到work-life balance喇。
李華華
mailto:[email protected]