荷李活真係越嚟越睇重內地市場，阿里巴巴創辦人馬雲同趙薇都有份嘅阿里影業（1060）啱啱公佈入股荷李活大導演史提芬．史匹堡嘅電影公司，轉過頭，趙薇同樣有份嘅中國創意（8368），又話幫荷李活電影《賓虛》做內地宣傳。
《賓虛》由美國米高梅電影公司出品，美國派拉蒙影業公司發行，製作費高達1億美元，改編自著名小說《賓虛：基督故事》。呢套電影1959年版曾獲得奧斯卡最佳影片等11項大獎，但今時今日年輕一輩或者十年都睇唔到五套戲嘅「傑青」未必知道《賓虛》有乜咁巴閉，8月係香港上映都冇乜人留意，就連落咗都冇人知。
唔知今次搵埋中國創意幫手，套戲喺內地上映會唔會好啲呢？話晒根據合作協議約定，電影喺中國收唔收得，會成為中國創意獎勵收入嘅指標。