食住花生睇好波，或者呢個係唔少球迷嘅習慣。NBA第二單波衫心口贊助廣告已經落實，以薩克拉門托為基地嘅果仁公司藍鑽石，贊助當地球會帝王，為期三年，贊助費就冇公佈，不過預期比76人簽嘅500萬美元（約3,880萬港元）一年好啲啦。睇嚟帝王球迷要改吓習慣喇。
揭幕戰大炒馬卡比
NBA喺2017/18年批准喺波衫賣廣告，唔好睇少心口呢個2.5吋乘2.5吋嘅位呀，一般估計勇士、湖人同紐約人呢啲市場價值龐大嘅球隊，每年贊助費至少達1,500萬美元，不過暫時落實嘅都係實力較次、影響力較低嘅球隊。帝王周一襯住新主場黃金一號揭幕呢個大日子，上演對海法馬卡比嘅季前賽之餘，順便公佈埋同藍鑽石簽訂三年波衫廣告合約，加埋新主場同後備席廣告位等；美國《福布斯》雜誌就估計，帝王呢單交易嘅收入，會超過每年500萬美元。嗱，球迷好多時都一邊睇波一邊食零食，藍鑽石呢次嘅公關手段真係高明，唔知其他零食商會唔會跟風呢？
講番場比賽，帝王喺新主場出擊，面對次一級對手當然冇留手，中鋒吉辛斯（DeMarcus Cousins）只打17分鐘都貢獻14分同四個籃板，加上基爾（Rudy Gay）入11分，主場135:96大炒海法馬卡比，打開新主場勝利之門。