香檳配甜品，原來係最邪惡嘅配搭，香檳消滯清口，可以令你食得落更多甜品。今年旅發局美酒佳餚巡禮，品味館就請嚟文華東方酒店推出「甜品花園」（圖），枱面上嘅樹幹、樹葉、雀仔同甲蟲全部栩栩如生兼食得落肚，每位$688，可任飲占士邦至愛香檳。
原來文華行政糕餅總廚Yves Matthey好鍾意行山，佢將行山見到嘅動植物融入甜品花園內，除咗有士多啤梨味甲蟲、薯仔形嘅醬爆Tiramisu同番茄形芝士蛋糕，當然唔少得經典嘅1963文華芝士蛋糕同自製玫瑰花瓣果醬配英式鬆餅。
甜品花園有15款甜品任食，仲包4款三文治同鹹點。怕食唔晒？場內有兩支香檳任飲，幫你清口解膩，包括占士邦至愛嘅Bollinger Sperial Cuvée NV同Moёt & Chandon Impérial，前者配鹹點同水果味甜品，後者則搭比較甜嘅朱古力甜點。