正所謂花無百日紅，朗尼呢期繼曼聯表現低迷，連踢國家隊都一無是處，周二作客斯洛文尼亞嘅世界盃外圍賽更被貶為後備，朗尼老婆高蓮就大發獅威，喺Twitter留言話：「我哋兩公婆都唔係膠，係人，大家批評都要顧吓感受。」不過作為香港高登仔一員，對住呢個「膠」字，又點會唔係另一個諗法。
修夫基棄用
廣東話粗口真係博大精深，家陣大台每個星期日都搵嚟大學教授做節目講解一番，香港高登仔都充滿創意，之前神獸卡玩粗口諧音，又將大意犯錯引伸為「派膠」，食正其中一個粗口大將軍嘅諧音。英國人當然唔明膠有呢個意思，朗尼老婆高蓮睇住老公受千夫所指，佢竟然企出嚟同萬千網民開火，真係夠晒勇，其中一個金句：「We're not plastic, he's not plastic, we're people」（我哋唔係膠，佢唔係膠，我哋係人），原意係希望網民對佢哋嘅批評留一手，不過見到個膠字，高登仔又點可以唔會心微笑，朗尼唔係成日派膠，又點會由一個天之驕子，變成國家隊同球隊嘅負累，最終被貶為後備。
30歲朗尼未驚過
講起金句，朗尼回應自己低迷狀態都用電影《未來戰士》嘅金句：「I'll be back」，話自己只不過30歲，一定可以東山再起。有信心係好事，佢之前對利物浦嘅比賽，都有唔錯表現，下周一英超雙紅會就開打，睇吓朗尼有冇機會back到啦。