內地人已經成為本港保險公司嘅大客，中銀人壽唔執輸，近年亦埋位爭餅仔，仲專登喺銅鑼灣開設客戶服務中心，畀班客仔喺中心一站式做完體檢，就即刻可以交保費，幾咁貼心呀。
呢個客戶服務中心噚日開幕，仲有位清純護士姐姐Elvis駐場。中銀人壽執行總裁老建榮（Terry）趁熱鬧，即刻摺起衫袖show一show手瓜……示範量血壓咁啫。
不過唔知係咪護士姐姐太標緻，搞到Terry上壓升到去150，搞到Elvis姐姐笑到酒粒都出埋嚟，話「真係高咗少少」。根據衞生署指標，成年人上壓有140已經算高血壓㗎喇。
Terry就尷尷尬尬咁解釋，話只係現場有太多傳媒朋友望住佢量血壓，搞到佢好緊張，所以上壓先咁高啫，佢每個星期都踢波，又有戴手帶計每日行幾多步，健康唔錯咁話喎。
不過護士姐姐咁可愛，第日班客個個上到去都量到高血壓，會唔會過唔到體檢，唔受保㗎？