練馬師文家良早已無主帥巫斯義可用，不過佢一直成績仍過得去，剛戰便與田泰安合作勝出「靚猴王」。到了本周三(12日)快活谷夜馬，文家良又倚重哪一位騎師呢？原來今期佢有個影子主帥，看部署似乎準備好大搏殺。
向來與文廐合作不多的本港前冠軍騎師潘頓，周三突然獲文家良重用，將策「辣得寶」、「小島怡情」及「勇少爺」三匹文廐馬上陣，動態絕對唔尋常，擺明希望借助潘頓騎功，令馬房成績有突破。
上述戰馬中，第八場「勇少爺」上仗直路狂追跑第二，今仗必受注目，機會突出毋須多講。其實第一場「辣得寶」、第三場「小島怡情」亦值得留意，呢對馬上場均後上跑第四已試準，尤其「小島怡情」，過去潘頓曾策同主馬「小橋流水」取得9捷，包括揚威2012年英國皇家雅士谷皇席錦標，可見幕後非常器重潘頓，今次突然搵潘頓初騎「小島怡情」，無非認定馬兒已到位，因此要強配潘頓，確保萬無一失。