周日喺羅馬尼亞舉行嘅歐洲桌球大師賽，英格蘭球手鄧立普喺決賽對同胞奧蘇利雲嗰陣一度落後6:8，轉捩點喺第15局出現，當時佢入咗一個難度極高嘅藍波，之後就信心返晒嚟，最終更一口氣連追三局，以9:8反勝「火箭」，贏得個人第六個排名賽冠軍。至於奧蘇利雲今次係自2010年來，第二次喺排名賽決賽輸波，但佢賽後都讚鄧立普今仗嘅表現係實至名歸。