香港網球公開賽2016正賽噚日喺維園展開，美國嘅「大威」威廉絲（Venus Williams）打頭陣出擊，首圈面對細自己14歲嘅日本新星尾崎里紗都冇留手，直落兩盤拍走對手，順利晉級16強。
大威噚日下午進行比賽，可能天氣有啲熱，佢喺第一盤同尾崎里紗都咬得好緊。不過36歲嘅大威始終經驗較好，先贏第一盤6:4。第二盤大威越打越順，開波球速仲越嚟越快，仲未使出「洪荒之力」已經可以開出高達時速179公里嘅球，搞到尾崎里紗有時都打到跣晒腳。最後大威輕鬆贏第二盤6:1，晉級八強後會鬥法國球手干妮迪。大玩親民嘅大威唔止同本地小球員打波，仲讚佢可愛；而面對小球迷要求簽名同合照，大威都冇托手踭！
姬芭玩住備戰
至於噚日冇賽程嘅世界「一姐」姬芭同「丹麥甜心」禾絲妮雅琪，就喺朝早出席「Can Challenge慈善領袖賽」，仲玩得好開心，睇嚟心情幾輕鬆。本地足球員陳偉豪都有份玩，不過打網球都「Own Goal」嘅佢打中對手個樽兩次，最後由衞冕賽事嘅積歌域同羽毛球代表魏楠嗰組贏得慈善賽。