本地騎師鄭雨滇上月18日策騎何良馬房「星光勇將」，被指在比賽途中四度未盡全力，馬會因而判罰他本周三(12日)賽後，停賽25個賽馬日，最尷尬是「星光勇將」再出隨即由梁家俊勝出，令滇仔進一步受網民非議。
表面上滇仔明年1月14日賽事便可復出，但唔好忘記，滇仔另外涉及策騎「亞馬寶寶」、「好老友」及「田黃」出賽前，疑似曾向非馬主或練馬師的人士，透露上述馬匹狀態的資料，事件會點發展仍是未知數，所以滇仔本周三快活谷停賽前一戰，真係要好好珍惜爭勝機會。
今期鄭雨滇只得兩匹座騎第三場「天狼星」及第七場「日出彩虹」，都出自徐廐，徐雨石雪中送炭認真唔話得，其中「天狼星」季內兩戰同程谷草1200米得一冠一季全上名，遲熟6歲北半球愛爾蘭馬，似乎仍有點進步空間，今仗有運抽4檔好位，即管看看「天狼星」能否成為滇仔暫別前最後一場頭馬了。