N年前，會計師係唔少大學畢業生嘅理想職業，無他，高薪、專業，但今時今日可能只得「高辛」，近年仲成日聽到有關Big4裁員減薪嘅消息，不過大家又唔使成日提住負面消息，不如講講Big4入面，究竟邊間生意最好，大家爭取入呢間會計師行仲好喇。/p>
翻查50間藍籌資料，最威係羅兵咸永道（PwC），足足一半（25間）搵佢做核數師，舊年單計核數費用，合共袋走16.3億元。PwC舊年搵到滙控（005）呢個大客，已經有近5億元核數費，加埋長和（001）、中移動（941），發過豬頭。
PwC一行獨大，另外三間再分餅仔，自然有難度。不時傳出裁員減薪消息嘅畢馬威（KPMG）就密食當三番，做11間藍籌嘅核數師，舊年收核數費逾4.2億元。安永（EY）雖然只得4隻藍籌做客仔，但收逾3億元核數費用，都算係少食多滋味。
香港會計師公會前會長陳錦榮分析，傳統上，PwC與KPMG網絡比較強，上世紀80年代已經有好多英商客戶，KPMG更加擅長服務金融、銀行客。
KPMG近年冇咁威純屬唔好彩，事關監管要求企業定期替換核數師，KPMG本身有中移動、滙控等大客在手，無奈被換走，同時又無旗鼓相當嘅新客加入，行內人暗地裏都話KPMG黑仔。
再講遠啲，有會計界老行尊指，PwC千禧年後，兼併安達信（Arthur Andersen）中港業務，當年效力安達信嘅方黃吉雯（丈夫係證監會前主席方正），內地人脈強勁，併入PwC後，幫手拉到唔少內地生意，鞏固到PwC地位，雖然佢2008年退休，但喺政商界依然活躍。
有現役PwC合伙人都話，好尊重方太，但亦唔好抹殺其他Partner幫公司拉生意嘅努力。
