泰國C根據曼谷朋友聽巴育將軍就黃之鋒事件之詳細發言（近半小時），泰國報章報導及政商界流傳嘅消息，指泰國不准黃之鋒入境，並將佢扣留12小時等飛機遣返香港，完全係應中國要求，充分配合嘅啫。泰國與中國外交關係要好，徇友邦要求行事，拘留友邦國民，係合乎外交常規之事，即等於美國政府要求英國移民局在希思路機場拘留一名美國公民而已，有乜好大驚小怪？泰國C認為香港人唔應該怪責泰國。
左丁山對泰國C講，此事怪在香港人懵然不知，持中國香港特區護照外遊，就係一個中國國民受中國外交部「照顧」之人，好之時救急扶危，壞之時當你係異見人士、政治疑犯，可以知會外國政府與你為難，當罪犯咁樣查辦。如黃之鋒、羅冠聰等人，去菲律賓仲可能危險啲㖭，菲律賓總統下令對「嫌疑毒販」格殺勿論，槍殺唔駛審嘅。將出任立法會主席嘅梁君彥議員以前持英國護照當作「旅行證件」，依家為咗做主席，先至捨棄，中間嘅竅妙，大家明白嘅啦。在香港講一國兩制，一旦手持特區護照出外旅行，就係一國一制，中國不少新興國家友邦──如泰國、柬埔寨，係好願意聽晒北京話嘅。
中國憑13億人之經濟力量，以絕對數值取勝，經濟人海戰術（如大量出外遊客之血拼行為）所向披靡，於是好多國家自動走入中國影響範圍，最新嘅例子就係菲律賓，新任總統不惜與美國撕破面皮，先罵奧巴馬係SOB，近日叫佢You can go to hell，話明以後不再與美國舉行聯合軍事演習。呢啲行為都幾似一個僕人突然挺起條腰，向老東家大聲講一句：「×你呀，我唔同你做嘞，隔籬C老闆想我過去。」老僕後邊嘅卒仔覺得阿頭有吉士，大聲喝彩鼓掌，幾乎激死老東家。但老僕去做西家，後事如何，好難預測，西家或者係更刻薄嘅老闆呢，菲律賓係最崇拜美國之亞洲人，不少人民願意加入美國為第51州，富豪盡皆有大量資產放在美國本土之美資銀行，官二代三代，富二代三代盡量留學美國，咁嘅國家，會同美國反面？吾不信也。況且菲律賓經濟以華資企業為主，原籍福建嘅華人商家控制大部份產業，如菲律賓與中國過份親近，華人企業佔盡優勢，唔惹起民族情緒反彈先至奇。杜特總統暫時仲係好威風嘅，但美國適值換屆選舉，唔得閒理會佢，一到希拉莉上台，杜特還夠膽講fxxx you？