喺曼聯被貶為後備嘅朗尼，上周六以隊長身份帶領英格蘭踢主場贏馬耳他2:0場世盃外，但因為繼續做隱形人，而俾自己粉絲噓到暈；咁都未算，佢仲涉嫌瞞稅而有可能受到調查，最終可能要嘔番500萬鎊出嚟，名副其實係衰開有條路。
贏兩球修夫基收貨
由修夫基暫時領軍嘅英格蘭，喺溫布萊對住弱隊馬耳他，靠史杜列治同埋迪利阿里入波而贏2:0，雖則唔係大炒，但總算順利全取三分。修夫基賽後表示：「我哋當然仲有改善空間，但踢咗兩場分組賽都贏晒，形勢都算幾好。去到下半場我哋知道贏梗，所以班球員都冇去盡，留力打周二對斯洛文尼亞場波。」
講到喺中場領軍嘅朗尼俾英格蘭球迷狂噓，修夫基就幫呢個30歲嘅紅魔球員護航：「我唔明球迷點解要噓朗尼。我認為佢嘅經驗同埋領導能力對隊波好有幫助，唔單止係呢場比賽囉。」另外，曾經喺曼城教過四季嘅意大利籍教頭文仙尼（小圖），今場亦有現身溫布萊球場，唔通英足總打算搵佢做「三獅兵團」下任主帥？
投資為避三年稅？
朗尼喺曼聯同英格蘭都失寵，仲喺上周六場世盃外俾馬耳他球員通坑渠，認真樣衰！但低處未算低，佢仲涉嫌瞞稅而搞到一身蟻。英國《太陽報》報道，佢投資咗1,250萬鎊落一間電影公司度，等自己三年都唔使交稅，但其實咁做係犯法；消息話，呢間電影公司其中一個話事人，係利物球名宿杜格利殊。除咗朗尼，有個外國球星都落咗搭，投資咗幾十萬鎊。呢位球星咁話：「我真係好嬲，之前冇人同我講過咁係犯法。」
消息指，英國稅務海關總署將會展開調查，朗尼最終有可能要嘔番500萬鎊出嚟。姑勿論佢係俾杜格利殊跣定係佢明知故犯，可以肯定嘅係佢衰貪心，搵咁多都唔願交稅盡公民責任囉，朗尼呢次場外場內都出事，有排佢煩喇。
