若有一天，醫生診斷你的腎功能跌至不足一成，終身需接受洗腎，你會怎樣？抑鬱沮喪？拒絕接受？同樣曾經歷低潮的小提琴手郭子健，則選擇重踏舞台。「自從患病，比一般人易攰，又要經常接受治療，但唔係世界末日。」33歲的「肥仔」郭子健，是樂團開心果，一年前久咳不癒入院檢查，以為只是尋常感冒，竟確診末期腎功能衰竭，需一星期洗三次腎，正輪候換腎的他，世界不再一樣。香港業餘管弦樂團在網上發起為他義演籌款，心意化為樂聲，如天上之弦，見證人間有情。
記者：呂麗嬋
「我一定瞓身參與，等佢永遠欠我呢張人情牌」。同樣是小提琴手的盧柏謙，是「肥仔」郭子健音樂上的好兄弟，今次義演，哥兒倆將在舞台上合奏一曲。「等咗呢個機會好耐，佢無得拒絕」。因小提琴結緣成為好友，盧說：「第一次見係喺台上，佢同我講：漏咗條弓無拎上台！」坐近後台，貓步助拎弓補鑊，不「蝦碌」不相識。郭聞言笑着自爆：「呢次未算最經典，試過忘了帶黑皮鞋，只着黑襪上台扮鞋！」
台上西裝筆挺滿面嚴肅，台下是相知好兄弟，沒正經的你一言我一語，笑聲充滿小小琴室。在演藝學院音樂系畢業的郭子健，主修小提琴演奏，未患病前，積極參與不同管弦音樂會演出，包括玉置浩二演唱會。「今次音樂會，我揀咗貝多芬康復接受治療期間所寫嘅樂章，希望自己都可以好似佢咁，就算患病，對生命仍然充滿熱情」。
父親是巴士司機，出身基層的郭子健，偏愛古典音樂，曾幾何時，做職業樂手是他的夢想。「細個其實想學鋼琴，都係因為土地問題，屋企放唔落一部琴，先轉學小提琴」。大抵沒多少人期望他成為音樂家，中二那年，他卻遇上音樂路上的啟蒙老師。「老師其實教英文，不過係古典音樂發燒友，知我學小提琴，成日搵我傾偈，問我識唔識阿邊個邊個作曲家，又送CD我聽」。
他讀的是粉嶺街坊中學，無常設的管弦樂團，同學都只會聽流行音樂，他卻迷上莫札特和貝多芬。「真係日日練6、7 個鐘，人哋去補習，我就教琴揾外快。」一手催生今次義演的香港業餘管弦樂團團長蘇潔明說：「識佢時佢只有14歲，獨奏時我已心諗，呢個肥仔點解可以拉得咁好？」以前，欣賞的是他的才華，今日卻佩服他在逆境中的態度。「大班人一齊玩音樂，好美妙，搞呢個音樂會，係想話佢知，就算有病，條路都唔孤獨」。視肥仔健如親弟的蘇說。
不同程度的腎病患者，估計約佔人口的十分之一。據醫管局數字，在公立醫院接受治療的末期腎病患者約有8,000多人，數字未計私診病人。向來健康的郭子健如「中了頭獎」，罹患頑疾亦感意外。「好少睇醫生，嗰次都係因為咳咗好耐，面色好差，朋友開車挾我去睇」。抽血化驗，翌日入院，當晚已證實腎功能跌至不足一成，需緊急安排洗腎。「之前連醫院都無入過，同好多人一樣，猛問點解…」
30出頭，家中無此病史，醫生也說不出病因，一夜之間，便得接受自己是長期病患者的現實。每星期洗腎3次，每次5個小時，每個月單用於洗腎的開支，便要萬多元。經濟壓力沉重，朋友紛紛伸出援手。「佢哋過晒啲學生俾我教，一時話唔得閒，一時又話指明搵我教」。習慣自給自足，月接20學生支持洗腎開支，負面情緒壓下去沒處理，半年前，走進抑鬱死胡同。
「唔想出街，連最鍾意嘅小提琴都唔想掂，覺得死咗更好，唔使累人累物，但其實我一直好多朋友，不過你個人喺低潮，你唔會識咁諗。」這樣的狀態，維持了一個多月。「現實咁講，唔出街教琴我真係無錢接受治療。」向醫生求助，迫自己參與更多演出，忙碌的生活，讓他走出陰霾。「好多人話夜深人靜最多感觸，我一返到屋企，往往因為太攰，好快瞓着」。他說：「後來諗通咗，腎病始終係最輕微嘅絕症」。
接受了，就釋然。「成年人好多說話都不會說出口，身邊好多朋友，都係用行動嚟支持我。」郭說。名為《煥然一腎》的音樂會，十月十日在上環文娛中心劇院舉行，香港腎臟基金會認購部份門票，讓病友免費入場。發起今次籌款活動的蘇潔明謂，約有50位樂師參與演奏，既有老朋友，也有新認識的團員，部份甚至是響應網上號召的音樂人。樂團將資助活動開支，收益全數撥捐洗腎及換腎。