班底對一個特首嚟講，真係好重要，5年前嘅今日，政壇元老鍾士元親身到政務司司長官邸同已經辭去司長一職嘅唐唐見面，親自就特首選舉教路，當時仲有消息話，另一位政界高人、前布政司鍾逸傑就幫梁振英寫政綱，尤其梁振英稱之為重中之重嘅房屋政策。而關注基層市民生活問題、多啲落區同市民接觸呢個方向，據知都係鍾逸傑教梁振英㗎！
話達唔到佢期望
無可否認，梁振英當年份政綱，寫得好好睇嘅，所謂嘅「一支筆、一本簿、一張凳」落區亦好動聽，但問題係……做唔到嘛，咁做唔到嘅原因係乜？除咗梁振英或者高估咗自己，會唔會係個班底唔多掂？
而鍾逸傑去年受訪時講過，如果立法會嘅拉布問題冇改善，唔會撐梁振英連任，仲話梁振英達唔到佢期望。唔知鍾逸傑嘅轉向，對大家有冇啟示？