周日喺上海舉行嘅NBA季前熱身賽中國站，火箭憑主將夏登（James Harden）交出「雙雙」25分15助攻，以123:117擊敗由「一眉」安東尼戴維斯（Anthony Davis）領軍嘅塘鵝，而兩隊喺周三會移師北京再打過。
作為東道主兼啱啱入選名人堂嘅火箭名宿姚明去睇波唔出奇，但估唔到前中國欄王劉翔、柏迪亞（Shane Battier）同莫湯保（Dikembe Mutombo）等NBA名宿都有到場。火箭為咗𠱁班中國球迷，仲特登着咗件印上「火箭」中文字嘅波衫。其實今場比賽打得好緊湊；火箭除咗夏登打得好，射入21分嘅賴恩安達臣（Ryan Anderson）都係贏波功臣。
獲迪轟22分破溜馬
另外，公牛喺上周六嘅熱身賽主場以121:105擊敗有主力保羅佐治（Paul George）缺陣嘅溜馬，而今夏重返家鄉球隊公牛嘅獲迪（Dwyane Wade），就射入全場最高嘅22分，當中更包括三球三分。
