這天第六場三班1650米泥地發生意外，起步跑咗一段短路程後，全場最冷157倍的「銀豐神駒」失蹄將騎師蘇狄雄拋下，結果空馬由頭帶到尾率先衝線，可惜冇騎師騎住唔算數當包尾，而蘇狄雄落地時曾暈一暈短暫失去知覺，但很快清醒起來，之後立即被送到醫院，而蘇狄雄餘下座騎須易配。
蘇狄雄在沙田威爾斯醫院接受觀察，他曾接受兩次電腦掃描，包括腦掃描，兩次報告出來都沒有大問題，不過由於雄仔說話出現不太靈光情況，為了穩陣起見，他將會今晚留在深切治療部（ICU）過夜，接受進一步觀察。到傍晚6時左右，馬會最新消息是蘇狄雄的說話能力正常番少少，馬會謂會一直跟進其情況。
至於今場真命天子是楊明綸策騎、方嘉柏馬房的「雲呢拿」半條直路後上一攻而破，七歲馬爆10倍半冷Win今季首度獲勝，組合獨贏A2派34元。
「雲呢拿」在港出賽四季，每季都有一Win，而且每次均贏泥地，可謂馬有馬性，馬主蕭劍平今季首次拉頭馬，佢名下現有四駒，除「雲呢拿」外，其餘都係A字頭而未命名的今季入口三歲愛爾蘭自購馬。
講番楊明綸同方嘉柏，這天原本楊明綸已勝出第三場「按得贏」（沈集成馬房），方嘉柏則贏第二場「金武士」（騎師莫雷拉），加埋呢場「雲呢拿」，楊明綸、方嘉柏各自梅開二度，其中楊明綸今季首次贏沙田日馬即起孖，至於方嘉柏在季內五次有馬贏的賽事，其中四次都係起孖或中三元。
呢場二至四名順序為「勇冠王」、「步步領先」及「金多多」，四重彩派四萬八千幾，三T正獎有人中，每注派378萬幾。