這天沙田日馬開場前，貴為前冠軍騎師的潘頓已經四期冇馬贏，表現同手風都曳到你唔信。不過世事從來物極必反，潘頓這天跑到第七場三班1000米直路賽終於發憤，夥拍告東尼馬房、莎莎老闆郭少明愛駒「美麗皇牌」守好位輕勝勇奪博愛盃，「美麗皇牌」呢匹大熱門亦成為今季首匹兩捷馬，單Win及組合獨贏A1分別派26及16元。
今場潘頓騎「美麗皇牌」有段古，同場直路賽專家「皇仁大師」上場於潘頓胯下Easy win，仲造出快時間，但潘頓以為「皇仁大師」唔會跑呢場，而會增程角逐1200米，於是一早應承騎「美麗皇牌」。結果基於呢個誤會，「皇仁大師」換田泰安，潘頓錯有錯着騎番「美麗皇牌」得以獲勝，此駒7檔出閘順勢移出外欄，然後逐步加速贏個多馬位，馬主郭少明扶老攜幼，賽後率領二、三十人拉頭馬，場面極度墟冚。
年約46歲的94年亞洲小姐冠軍、現役馬「洪荒駿駒」馬主陳李妮，賽後以博愛董事局主席身份，將博愛盃頒予郭少明，後者揸弗的「美麗」系馬今季已取三Win，當中包含「美麗皇牌」兩捷及「美麗鉅星」一捷。其中「美麗鉅星」早前田草開齋贏仁濟盃，鞍上人亦係潘頓。
呢場二至四名順序為「手到拿來」、「皇仁大師」及「火麒麟」，四重彩派5,091元。