銀行見習生Y原來已經升咗級，銜頭係副經理，眨吓眼，入咗銀行已經三年，升級都係應該㗎嘞。純粹講「副經理」呢個職銜，究竟係乜級數，唔係幾知。當今職銜通脹（title inflation），銀行內有不知幾多VP（副總裁），難辨高低。左丁山40年前做銀行，升級好慢，見習生做完兩年，一定升做主任，然後係襄理，副經理，助理副總裁，副總裁，資深副總裁，執行副總裁，總裁只得一個，99%銀行員工未做到助理副總裁已經退休，左丁山等trainee出身之人，有資格升到副總裁或更高，但已是年近50歲嘅事咯。
依家MBA畢業入銀行，唔駛三年已經係副總裁，之後就係Executive Director、 Managing Director；渣打銀行年初宣佈裁減MD級，竟有過千人，可見呢個職銜已經貶晒值，但係好似副理Y咁，聽落又好似40年前作風，年青賓架可能感覺唔舒服。
副理Y要考香港銀行學會（AHKIB）會士資格，已到最後階段，佢問左丁山：「原來有四個範疇，分別係信貸（Lending），財資（Treasury），營運（Operations）及財富管理（Wealth Management），我應該揀邊一科？」咁複雜嘅咩？左丁山年代，考倫敦IB只有信貸與信託（相當於今日之財富管理）兩瓣，絕大部份老友考信貸，只有賓架P兩樣考齊，抵佢在銀行界乜都識。個人意見認為商業銀行之最基本業務就係信貸，一定要選呢科。至於營運，較適合大學主修會計嘅學生，財資呢？唔係個個人啱做，炒房殺手要別具一格，最啱有快狠準兼少少賭博性格嘅朋友去專修，至於財富管理梗係當時得令，最易搵工嘅項目，間間銀行都搶人，但如果真係要做財富管理，不如考CFA啦。呢個資格全世界都承認，搵工跳槽嘅敲門磚，基金經理之入門標準，考CFA要幾專心刨吓書，費事考銀行學會嘅財富管理咯。講咗一大輪，左丁山對副理Y之勸告就係首先全力攻下IB，之後去考CFA，希望30歲達成兩大目標。在校友會活動，碰到不少年青中大校友在金融界服務，有好多個係CFA，問佢地難唔難考，個個都話：「幾順利，冇肥過一科，一路通車。」咁講法，似乎呢個試難唔到中大年青畢業生，或者左丁山所見嘅校友，係「偏見樣本」（biased-sample）啦。