咩叫得勢不饒人，睇姚本輝馬房近期戰績就知，這天跑到第四場四班1400米，他以「踏雪無痕」在蔣嘉琦胯下一放到底，單Win及組合獨贏A2分別派74及19元。近六次賽事姚廐五次有馬贏共取七Win，馬兒敲響今季勝鼓，騎練亦告季內首次合作贏馬。
「踏雪無痕」以往3捷全由黎海榮經手，上仗仍是用黎海榮跑第六，但今仗卻飛起榮仔，改配之前騎過一次落第的師妹嘉琦BB，人馬故劍重逢3檔起步，照例均速前置跑主動，結果成條直路後面馬匹都係得個追字，冇一駒追得過佢，「踏雪無痕」就此贏四分三馬位，馬兒完成1400米四捷，嘉琦BB亦告連續第二次沙田日賽建功。
今場二至四名有冷有熱，分別為「津津樂道」、「駿馬翹楚」及「精彩樂韻」，四重彩派五萬八千幾。其中「踏雪無痕」搭「津津樂道」36倍啡燈Ｑ得手，落飛黨扣本後在這條Ｑ身上獲利約1,200萬元。