數近排最紅騎練，莫雷拉同方嘉柏肯定有份，兩人於這天第二場田草五班1200米雙劍合璧，就此贏出後備補出馬「金武士」，雙雙延續個人勝勢，單Win及組合獨贏A3分別派105.5及26元。「金武士」10.5倍在很多人眼中不算冷，但原來這已是雷神個人「罕有」的冷Win，亦是他自2015年3月15日贏14倍「紅白」之後，個人最近19個月以來最冷頭馬。
五歲澳洲自購馬「金武士」當初排位時列第一後備，並已設定由雷神策騎，雷神少有地無卜定正選馬而寧願做後備馬騎師等補出。果然排位後有「大地和平」退出，「金武士」順理成章地補上並排14檔，隻馬初次降入五班負133磅，陣上留前鬥後，直路尾於最後一步才追過一早突圍的冷馬「欖球鑽石」，「金武士」第12次出賽首度配外籍騎師，終打開在港勝門，雷神亦保持停賽復出未斷纜，「欖球鑽石」功敗垂成跑第二。
呢場三、四名分別係「喜威威」及「幸運坊」，四重彩係全冷門天下，每注派16萬幾。
「金武士」馬主林景培在港澳兩地都有養馬，三年前暑期有次雷神往澳門客串一日，幫佢贏過已退役的「大霸王」，今次則係佢哋首度在港合作贏馬，亦係林景培本人近六年內首次在港報捷。「金武士」另於周三晚（12日）谷草五班1200米列正選評132磅，這天勝出依例加七磅，因負磅超出上限，屆時排位前將自動退出，反而同組亦為正選的「欖球鑽石」則可照跑。