基斯坦奴朗拿度（C朗）一復出，即刻幫葡萄牙喺世盃外大勝，主場以6:0大炒安道爾。C朗完全冇畀機會對手泊大巴，開波四分鐘就入兩粒，全場入四球，國際賽生涯首次「大四喜」，佢仲搞到安道爾兩個球員被逐㖭。
葡萄牙被編入世盃外B組，上個月首輪對瑞士，C朗未好番冇踢，結果葡軍就以0:2輸波；呢次C朗復出，成隊波就生晒，輕鬆解決世界排名203位嘅安道爾。安道爾諗住死守，但架大巴都未泊好，就被C朗拆咗。兩分鐘，C朗喺角球混戰中射入；四分鐘，C朗接應哥利斯馬長傳，頭槌破網。只係用咗四分鐘，C朗就宣判安道爾死守之策玩完。44分鐘，右閘祖奧簡斯路殺上嚟幫手，零角度射門破網，半場葡萄牙領先三球。
首次國家隊連入四粒
換邊後，C朗喺47分鐘射入第三球，葡萄牙拉開到4:0。呢次係C朗職業生涯第42次帽子戲法（見附表），四次嚟自國家隊，37次喺皇家馬德里完成，仲有一次喺曼聯。不過，C朗仲未入夠！眼見C朗如天神下凡，無人能阻，安道爾惟有用犯規戰術，不斷拉低踢跌呢位金球獎大熱門；喺62分鐘，安軍後衞盧比奧踢低C朗，被罰第二面黃牌離場。68分鐘，C朗還以顏色，當然唔係以暴易暴啦，佢攻入個人今場第四球，第一次喺國家隊「大四喜」。安道爾真係踢到躁躁地，中場列比斯70分鐘從後鏟低C朗，直接領紅被逐。
尾段變「防中」費事斷腳
C朗發現勢色唔對，再入波可能斷腳都似，所以喺最後20分鐘收住踢，極少入禁區，踢到好似防中咁。雖然C朗收油，但葡萄牙最後靠米基爾施華埋齋，主場大勝6:0完場。對於末段墮後踢，C朗賽後話：「我俾人撞咗吓，唔太舒服，所以之後就唔冒險嘞，好開心球隊繼續入到波。」佢好滿意自己同球隊嘅表現，話要贏晒之後八場世盃外：「我好重要，其他隊友都係。每次踢國家隊，我都會全力以赴，我覺得自己仲好有貢獻，好開心克服咗歐國盃嘅傷患返到國家隊。」葡萄牙星期一會作客法羅群島，相信C朗入波陸續有嚟。
