歐國盃冠軍葡萄牙上周五終於拎到世界盃外圍賽首勝，亞軍法國都冇失威，雖然基奧特、賓施馬等中鋒冇入選，不過憑GG前鋒組合加美路同基沙文包辦3個入球，以4:1反勝保加利亞，打開A組勝利之門。
法國A組首戰作客白俄羅斯悶和0:0，今場返到主場都有一定壓力，仲要六分鐘已經輸12碼，保軍由阿歷辛杜夫先開紀錄。法國教練迪甘斯呢場冇用柱躉式中鋒，不過加美路同基沙文兩個靈巧前鋒，喺馬體會已經合作愉快，結果上半場各建一功，加上中場皮耶遠射得手，已經反超前3:1。加美路下半場梅開二度，幫法國贏到4:1，就算「讓球主客和」開到[-2]亦一樣開「主勝」。
法羅群島爆冷W
同日其他強隊都大勝，同樣A組嘅荷蘭，主場4:1大破白俄羅斯，莫斯科斯巴達中場昆斯普美斯梅開二度，荷蘭兩戰取四分，以較佳得失球壓住法國排榜首。H組方面，比利時4:0大勝波斯尼亞，夏薩特、盧卡古等英超兵都建功。不過戰果唔係一面倒正路，拉脫維亞主場0:2不敵法羅群島，法羅群島爆出4.75倍冷W。