馬圈近日熱話離唔開鄭雨滇因上月18日，策騎何良馬房「星光勇將」得第四未盡全力，被馬會重罰本月16日賽事起停賽25個賽日。
「星光勇將」呢匹問題馬這天再戰，角逐沙田第五場四班泥地一哩，換上從未騎過的梁家俊，以居中後上跑法爭勝，沿途走大外叠蝕位無數，但梁家俊騎足全程非常努力下，拉士都仲可以頂住後上好勁的「電子鳳凰」衝刺，身價320萬的4歲愛爾蘭本港拍賣會馬「星光勇將」爆冷打開服役勝門，單Win及組合獨贏A2分別派135.5及28.5元。
何良本周做咗冷殺手，剛周三已有41倍「騰煌」由徒弟蘇狄雄爆冷捧走冠忠巴士盃，這天再整多隻13倍冷Win「星光勇將」，後駒同時為何廐打開今季泥地勝門，身價320萬元服役暫得一冠一殿，總獎金接近53萬，馬主鄭漢溢距離回本仲差好遠。
呢場係全日首場泥地賽，二至四名順序為「電子鳳凰」、「盈豐駿駒」及「威勢之寶」，前四名全屬有分頭馬，四重彩六萬四千幾。